瘋狂之夜

琴晚中學同學生日，約左8點幾出黎玩，所以放工之後留左係中心度整多少少野先走。

等齊幾個之後就上左去K Dinner，都好耐無同佢地一齊唱過玩過啦。我地去左Red Box，間房又幾大幾靚喎。

呢次出黎玩既同學仔，無左d玩得好癲既人，反而仲有個醫生出席添。佢畢業無耐就有自己的診所，的確幾令人羡慕，不過問到佢個工作時間，又的確令人汗顏，原來自己執業既話就要一星期返6日半工，一年仲得7日大假，印證唔辛苦係得唔到世間財既。（雖然岩岩先買左6合彩，等今晚開）

玩到咁上下，唱K都係滿足唔到佢地，以為第二日要返工佢地會檢點d，原來都係要出動酒水。我平時都唔飲，不過呢d時間就唔會掃興，最多就住。結果緊係好多個都貓晒，玩得好high。我就好頭痛，但係就好清醒，即係要計數都仲計到果隻。有時都幾羡慕d人可以飲到醉，乜都唔知，乜都唔諗。我就唔得，飲到頭痛就要停，去唔到果個地步。

最精彩居然係玩到掟蛋糕，呢個真係估唔到，照計應該反面，不過又真係好fd既，所以都係鬧幾句，話會報仇就算，唔會搞到好唔開心咁。

好耐無咁hea，好耐無咁喪，不過就未試過嘔三次咁多（嘔晒出黎幾好呀），所以呢d咁既聚會，都係一年半次好啦。

好彩今日Day Off，唔駛返工o者。