大肥羊, 咩, 小肥羊, 咩咩

今晚開全體職員大會，成個機構差唔多四百人去左，不過好似好多都係職工級員工，文職員工好似無咁support喎，我去都係因為被"鼓勵"去咋。

個會七點先開始，不過六點半度就差唔多無位坐，好在無啦啦有幾個後座，先唔駛做先頭部隊。聽左阿總監講左幾句，知道有得加薪喎，正；做多幾年無乜差錯就有轉長工，仲正。本身對個大會都無乜期望，聽完又覺得幾好喎，雖然都係有d野解決唔到，但係對個前途信心好似大左。

開會之後同唔同部門既同事（我諗咁樣既配搭，係其他地方做野都幾難見到，尤其係大老細都係度）去左食晚飯，終於試到鼎鼎大名既小肥羊。因為有d人唔食辣，有d人唔食羊，所以坐果時都要慢慢分好先。

之前成日睇網頁話邊隻羊肉好食d，邊隻無咁好食，不過黎到又唔記得，淨係記得叫個肥羊粉。結果係個羊肉組合度搵到好食果隻，真係好好食，浸完辣湯底仲惹味（個湯底本來好多辣椒，但bud下bud下bud晒落隻碗度，所以最尾個湯底係唔辣既）。個肥羊粉都好得意，煙煙unun咁又好彈牙。埋單百零蚊，又唔算貴喎，可能嗌得少肉啦，不過肉以外既野都好好食，好似芋頭蕃薯咁。

最尾落左去樓下食意大利雪糕，都係第一次食，有得試食既，試過又幾好食，d味好真啦，所以都坐低食左杯。

其實今朝食左個好豐富既KFC早餐（少左個鬆餅呀>_<），晏晝又食左個套餐加支雪條，夜晚又食得咁好，好滿足既一日呢?