遊船河

星期三四打左個叫做3號風球既8號風球之後，琴日朝早都仲掛緊個雷暴警告，但係個天氣居然仲可以咁好，所以都有去到遊船河加釣墨魚，結果曬到而家周身又紅又痛。

初初預每個人$300玩足10個鐘，兼包晒野食野飲野玩，但係因為臨時由40人激減至得番24人，所以唔包野飲之餘，仲要夾多少少，另外等人都等到遲左大半個鐘先上船，不過都OK啦，有得玩，唔計較得咁多。


是日出席名單：（左起）我, Franco, Queenie, Kodie, Mona, Woody, Crystal, 猩, Fan

上左船之後霸左個天台玩同影相，然後就去到一個都幾清既大蛇灣停低，我地就去左沙灘玩。玩乜？其實都無帶野上去玩，唔知玩乜，不過我就帶左兩部相機去影相，一部數碼，一部就係16連拍傻瓜機。係沙灘度用連拍影左一d好搞笑既動作特技相啦，不部傻瓜機因為係新買既，都未試過影，所以唔知影成點呢。^^呢個就係影菲林機既樂趣，未晒出黎你都唔知影成點，個效果可能令你好喜出望外。

係沙灘度都好似玩左差唔多2個鐘，好曬，就係呢段時間曬得最傷，又等唔到隻快艇黎接我地，所以我地就搵左個Mona扮傷（其實都有少少傷，不過真係好少），叫其他艇接我地D女仔返去，我地幾個男仔就用浮床遊返去。

返到船無耐又出左去玩香蕉船，多人玩真係唔同d，雖然好快撻落黎，不過好搞笑，經我地做實驗之後，發現最渣係阿Fan，有親佢都好快跌，有次3個人一齊坐，但係得佢一個跌。另外亦都用連拍機影低左佢地反蕉既16刻啦。

之後又上返天台玩啤牌，玩左99？？Killer？？同埋非洲話事啤。阿猩好唔好彩啦，玩4鋪有一半係佢輸，仲有一鋪亦都係Crystal輸:P。最開心係罰阿猩跳海，雖然無係天台跌落黎，不過係甲板度跌都幾好玩，炸到d水飛起晒，而且跌之前又要嗌”我好靚仔”，好好笑。後尾5條仔一齊跳，又係拍低晒影片連拍，好癲?都未夠喉，猜輸左又要跳，結果我俾人拋左一次落海，阿猩同Fan又跳左次。

然後去玩wakeboard，第一次玩咋，玩左4次就起到水，10次就企到添，好叻，哈哈?不過初初就易，企左之後真係好難平衡。下次有機會要再玩先得。

之後到左夜晚都無乜特別，可能個個都玩到好累啦，釣墨魚都無乜人釣，而且因為打完風，好多都釣唔到，全架船連埋船家先得4條，我都有1條架，仲有一條上左釣都俾佢走甩左。

最後上番岸就去左食野，是但揀左間泰國菜食，環境幾好之餘，野又好食，價錢又唔貴，值得推介喎，不過唔記得名。然後去滿記食甜品，阿Fan唔知做乜笑到停唔到-_-''。

遲d post相。好期待果16連拍。