days of 執野

我做野果度，有幾個倉，分別屬於唔同部門既專係用黎擺放物資既，而位置係屋村上樓既一d房仔。我個部門都有一個，係十七樓。早前因為中心黎左一大批物資，所以第一次上去視察下。入職果陣已經聽聞過個倉好亂好多野，得一見，果然聞名不如見面。個倉應該一百平方尺都無，一字型咁，d物資放到幾層咁高，好有壓迫感。於是，就約左主任第日上黎執倉。

執倉果日，一行人四五個人同呢個倉黎個大清倉。”dum唔dum？””dum””dum唔dum？””唔好dum，仲有用既”通常都係我話dum，我老細話唔好dum。所以最終係我堅持下，都dum唔到太多野。我覺得我主任真係有d似我，好鍾意儲野，不過我就有紀念價值先留，無既都拜拜；佢就見仲有d用都會留，好似d表演用具咁，都幾年無用過，但係佢就會話遲d表演可能會用番呢，所以留番。Anyway，最終都清到d空位出黎解決燃眉之急。

而係今日，實行左房間大修改第二步--執房（第一步係問阿爸）。為左放張新床（未買），所以要拆左個衣櫃，再將原本平排兩邊既書檯同床搬做L字。過程之中，將房入面既大部份物品（原來多數都係書黎）搬晒出廳，搬完書檯同床之後又搬番晒入黎，都幾爽。而當然唔少得既一個環節就係執垃圾，dum左好多野。

dum野其實都幾易，有時可能要少少決心先dum到，但係都好易，可能因為多數野dum左都可以再買過，所以dum錯都無乜所謂。但係有d野就真係好難dum，尤其是同回憶有關既野，所以我都儲左好多無用，但有紀念價值既野，小冊子呀，校簿呀，衫呀，飛呀咁。有d唔係物質既，都會用心記住，尤其係上個暑假。