一整天

放假的第二天，如常地9點幾10點就醒左（呢個習慣俾人話老人家，一般年青人應該訓到12點先岩）。晏晝三點幾先練波，不過因為唔想留係屋企，所以早左出門口行陣街先打波。練波得五六個人，其實都預左，同佢地打波，一係要預左少人，有人會放飛機，二係預左遲到。打波打得唔係咁好，應該都唔係技術差太多，而係有d心理狀態要調整下。

練完波6點，個人都散散地，去左體育館度沖左個涼之後就開始流浪，因為約左人11點去竹戰，又唔想返屋企再出過黎，所以周圍行。結果，行左幾個鐘頭街，買左少少野，都幾滿足，不過都係未買到相機，始終心大心細，唔知買邊部好...

本來想話睇番場戲，不過就無戲好睇，所以就行行行，行到腳仔都軟晒。食飯果時揀左間少d人既KFC，揀左個向街既位坐，有野食之餘又有野睇下，無咁悶。食完拎左d紙筆出黎寫少少野。

到左11點打俾個朋友先知原來改左11點半，唯有再行多半粒鐘，個人真係散晒。齊人開檯，本身我地既目的係想試打自動洗牌機，不過full晒，唯有人手洗牌。