泰國之旅-第3日

第3日：

由於第二晚"好早"訓，所以今朝都食到早餐，不過都已經係9點幾，早餐多人到要等位。岩既，黎放假既都想訓耐d。

食飽之就開始今日Shopping，目標係買到手信同禮物返香港。

好可惜，特別既禮物就買唔到啦，都係買左d好有可能係香港都買到既野，不過幾靚幾平咁囉。哈～又買左隻馬騮仔，內藏鐵線，可擺Post。

然後去食飯，諗住去一間叫做Zanotti食意大利餐，但係行左好耐都未搵到，好在問到個識講普通話既華僑，先知原來行錯晒方向，調番轉頭搵，終於都搵到。不過Full晒，明天請早，而且唔可以著短褲拖鞋，唯有訂定檯，聽日再黎。

所以我地退而求其次，去左一間叫做Mango Tree既地方食泰國菜。間餐廳個裝修幾靚，入口仲放左好多部古董相機 ^^。d野食好食，但都係唔及唐人街果度好食。唉～試過唐人街之後，其他野都比唔上添。
之後再去Siam行街，不過行得一陣就都係決定搵個地方Hea，但係搵個地方Hea都行左幾轉，因為想搵個好Hea既地方Hea，haha。

Hea完之後就去左Big C掃貨，掃左成車野食野飲，不過唔係拎番香港既，而係For今晚Last nite玩盡佢～而Mona就掃左成打敏感牙膏，平過香港好多喎。當然亦唔少得媽媽麵一大箱。

拎番d野返酒店同Hea多陣之後，我地就再戰唐人街生蝦王，今次夾埋掃左6碟，我地男仔個個都掃得多過一碟6隻，再加埋生燒大頭蝦，咖喱蝦，蝦餅，冬陰公，令到呢幾日食左既蝦既數目急升至近百，非常之滿足，但未夠喉，埋單後即刻走去買榴槤食。

今次試左另一款，係細釘既，細個d貴d，但係就非常之濃味同Creamy。之後再試番個大釘，Oh No，好似好稀咁，真係一分錢一分貨。5個人食兩大個榴槤都幾得人驚，haha。

返到酒店又係玩，今次玩得超High，王家偉好快就醉左，我地仲俾斜對面房走過黎叫我地靜d（果時係2點幾 :P）。所以我地唯有走左落去地下果度玩，王家偉都有跟到落黎，不過落到黎都係訓。地下果度都好Free呀，又舒服，我都飲左d酒（初初只係飲好難飲既果汁），玩到4點幾我都頂唔順，同王家偉走番上房訓覺，我就嘔番晒d酒出黎先訓。佢地就玩到6點零鐘，夾埋飲左兩支芝華士。

--
Jason Kwok (\/)@-@(\/)

泰國之旅-第二日

第二日：

今日既行程係入去Pattaya，約左9點車，朝早Franco突然打電話黎話8點2啦喎，咁我地即刻嚇到起身，醒晒之後望一望隻錶，原來只係7點幾，俾阿Franco坤左添，用左個香港時間呃左。

既然都醒左，走左上天台個泳池望望，好靚，但好細，浸浸就得囉，游水真係踢親人。

之後走左落去食自助早餐，都幾好食既，有即煎既雙蛋，好味。

坐左3個鐘頭既車終於都到Pattaya，去左個露台食午餐，好舒服下。

然後2個女仔去左做Spa，我地幾個男仔就周圍行，個海灘好大風啦，所以都無出到海，無落到水，有少少失望。

周圍行又無乜野好行，結果行左去按腳。原來泰式按腳係會用支棍仔幫手既。

之後去左間無乜人既Bar度飲可樂，同埋篤波食串燒。Hea完之後Join番d女仔就去左碌拎同玩足球機，玩到好High。

Then食左餐好難食既海鮮餐，最搞笑既係，我地叫左個海鮮拼盤，咁送左個沙律黎，但係d侍應居然話只可以俾兩個人食，真係無野好講，結果我地無食到。

之後再去左食個非常之好味既芒果糯米飯，上次黎都有食過，今次食過番尋味，一共買左6個，2個即食，4個打包～

然後再坐番3個鐘頭車返酒店，好累好累。不過有得上網，都算解左d癮

泰國之旅

今日係第三日啦，等緊同房訓醒去食早餐，所以打下Blog記低下個泰國之旅先。

而家用緊係王家偉部notebook，無錯，佢帶埋部notebook去旅行啦～

行程：

第一日：

未夠5點就起身，5點4就已經出到去等車，等到第二班車，終於等到班fd，一齊搭同一班機場巴士去機場，不過係車上面都係訓…

一去到機場，Woody同Mona就即刻跑去登記，原來佢地話以往都有好多人排隊，不過今日平安夜居然唔駛點排隊喎…

搞掂晒d野就入左去食早餐，又係食Popeye，但係好似愈黎愈差，杯奶茶緊加之係飲唔到呀。

之後等上機，都唔駛急，橫掂都編左座位，所以臨上機之前影左張大合照先（好鍾意影大合照，好齊人呀～）。

上左機之後揀左個窗口位坐，例牌影左d雲，香港呢排個天都幾靚呀。

訓左陣之後，玩下啤牌，玩下NDS，又玩下份上餐，咁就落機啦。

因為知道要排好耐先入到境，所以班機都未停定，阿Fan就即刻企起身想拎行李走人，結果緊係俾空姐嗌停左啦，Kaka

到入境果時真係排左好耐，好在揀左條好隊，後尾一開三，咁就快左好多。

然後拎行李（同上次唔同，今次無Delay喎～），同唱錢（對4.68喎，幾個月前都仲4.78，不過好彩，第二日係街度見到已經跌到4.58 O_O’’）

之後Woody出左張泰國用既Sim咭，同埋搵左部7人Van坐番酒店。

今次住呢間酒店雖然得3星級，不過都好靚呀，好有泰國feel，而且都近BTS站。我地分左3間房：Franco & Queenie，Woody & Mona，Fan & Halu & me。

Hea左陣之後就去左坐BTS去翟度翟買野同埋食第一餐：Waffle、不知名醃生果、串燒、粉麵、春卷、同埋7個人食一碟價值5蚊既雞飯 :P。然後行左陣翟度翟，好熱，而且今次好似無乜野行，同無乜野好買，所以無耐就走左。

出番Siam行左陣美食廣場，食左個多士好好味，食左條腸仔都好味，然後就坐係度Hea。

Hea夠就坐的士去唐人街食晚飯，因為分左兩架的士，所以我地果架都唔知係邊度落好，結果落左之後要行番轉頭join番大隊。

呢餐就豐富咯，7個人嗌左14隻生燒大頭蝦、5碟生蝦（共30隻）、2隻咖喱蟹、2煲冬陰公、2碟菜、同1碟獅um，埋單每個人都唔駛80蚊呀，又好食又抵。

之後係街度食左個大榴槤，真係好大，開出黎成大袋，好好味，不過Franco同Queenie就敬而遠之 :P

再去林真香買少少手信就返酒店，順路做左個好搞笑既泰式按摩﹝又講日文又無啦啦捉住我隻手去拖阿Fan隻手 O_O??﹞，最後買左d酒同小食返酒店。

再去到我地間房玩到2點幾就訓喇。（飲左8支啤酒、幾包小食、4個杯冬陰公杯麵）

～～第一日完～～

中心聖誕派對

22號呢日中心book左隔黎間茶餐廳開p,

嗌左好多野食, 食唔晒.

 

重點係交換禮物,

每個參加者都要買一份廿蚊左右既禮物交換.

經驗所得,

呢份禮物都唔好花太多時間同精神去買,

因為同事買果d都未必好...

 

結果買左盒盒蛋,

用紅紙包得靚靚咁,

仲寫左個祝福句係上面,

夠晒心思.

 

結果交換到一個地球儀...

另外其他同事抽到既精選禮物有:

- 多份朱古力

- 夏枯草藥包

- 餅乾兩大盒

- 苦瓜乾

 

最好既只有一份,

就係一支大原子筆,

成舊蘿白咁大支.

--
Jason Kwok (\/)@-@(\/)

24

what a amazing 24 hours!!!

--
Jason Kwok (\/)@-@(\/)

好天氣，好心情

頭痛...

又頭痛,
琴晚痛完,
今朝繼續...

南蓮園池

上個星期先去完南蓮園池，
今日再去以為無乜野睇，
點知原來落緊雨又另一番新景象。

Gym

因為好多fd都無續期做Gym，
加上自己好懶，
所以都成個幾兩個月無去。

琴日終於的起心肝自己去左做Gym，
雖然做左唔夠一個鐘，
而且做得無咁重，
但係都做得好充實，
做到好tired。

Cat9

襯DayOff又再幫貓仔影相，
好難影到小白，
一行埋去就避開，
所以都係影波子..

愛情

最近聽到朋友既邂逅，
又一次證明有d野要黎就黎，
好似都唔駛去追咁，
大家好自然知道乜事，
好自然就會走埋一齊。

我以往都係咁，
追女仔既經驗真係少，
多數都係好自然熟左之後就開始。

不過唔知係咪因為無追過，
發展得太快，
個感情就會無咁堅固呢？

人地提出提出既分手，
當然會唔開心，
但係就算係自己提出既，
其實都唔好過。

就好似欺騙左人咁，
點解初初鍾意，
後尾又會唔鍾意，
係咪因為最初發展得太快，
未真正咁認識了解呢？

而家每次都好慬慎，
唔敢去承諾太多將來既野。
點解愛情唔可以簡單d，
拎得起又放得低呢？

勁多時間...

因為返左中心燒碟，
屋企都燒得，
不過燒部機就做唔到其他野，
而且要燒好多隻，
所以返左中心燒，
燒緊果時又可以開另一部電腦用。

都有排燒，
所以大把時間，
可以順便執執琴日無心機執既野先。

大蛋撻

終於試左聖安娜新出既蛋撻，
食落隻蛋都唔多好多，
有d失望

飲飲飲

琴晚又去左飲，
不過唔係我飲，
係睇人飲。

點解要飲醉呢？
點解醉左會咁既呢？

睇住個fd而家咁，
好擔心...

丫... 面對住好多野... 無乜心機...

\ -_- /

 

--
Jason Kwok (\/)@-@(\/)

星期六

逢親星期六返工都無乜心得做野，
多數都係執下枱，
執下intray，
執下有d乜野漏左未做。

不過星期六既時間就好好用，
無咁多其他野阻住做自己野，
所以雖然星期六都要返工，
但係都幾relax。

夜景相

原來果晚都唔係影左好多相，
而且無乜見得人，
得下面果幾張好少少...

外拍

第一次跟大隊出外影相，
咁岩呢日Dayoff，
所以早左出去中環影相，
睇下有冇Magic hour，
可惜無。

之後去左Triple O's食Mushroomburger，
無Original咁好食。

整理番d相之後先再post出黎...

Mable結婚了～～

今晚同事Mable結婚，
雖然坐果圍都幾悶（個Rundown都幾悶），
不過都好開心。

同Mable唔係識左好耐，
都係佢落左黎柴灣先開始熟D，
不過佢好好人，
對人又好，
所以今晚見到佢結婚都鄧佢好開心。

鍾李聯婚



新郎新娘（鍾生鍾太）



件大露背+大花花好得呀~



同靚新娘影番張合照～



太好天啦今日，真係好～

討厭的人

很令人討厭的態度, 討厭討厭~~

--
Jason Kwok (\/)@-@(\/)

Cat 8

Cat8

都好耐無幫貓貓影相, 襯今朝幾好陽光又影下先.

辛苦完一日,
放番日假宜係感覺良好.

--
Jason Kwok (\/)@-@(\/)

再一次西灣河

呢個月內黎左兩次西灣河,
加上之前幾年都有黎過,
原來同呢度d職員都幾熟,
有好幾個成日要合作既都記得我叫乜野英文名,
個感覺好親切.

合作多左,
大家個默契都好左,
知道佢有乜野可以幫你做到,
你可以搵佢做;
有乜野佢地唔做,
咁就自己搞掂.
咁樣無乜"爭執",
都幾smooth.

不過下下都要播MD都幾煩,
搞到我次次都要由頭錄過d MD,
琴日成晚就係咁樣用晒...
--
Jason Kwok (\/)@-@(\/)

Proud of...

其實自己都叫做識得幾多野,

靜既又有,

動既又有,

等我數下先...

 

靜: 摺紙, 畫公仔, 設計海報, 玩電腦, 上網search野, 打字, 寫homepage, 影相, 執相, 剪片, 砌紙模形, 整小手工, set音響, 用電器, 打麻雀, 打機, 釣魚

 

動: 打排球, 打壘球, 打籃球, 打羽毛球, 打壁球, 打乒乓波, 打門球, 篤波, 游水, 玩衝浪, 抖爐

 

多就多, 不過無乜邊樣搵到食.

搵到食果d, 自己又唔夠叻 :p

--
Jason Kwok (\/)@-@(\/)

認識

要去認識一個人,

的確係幾困難既,

淨係要分係好人定壞人,

可能都要好耐時間先分到.

 

中心係社會既縮影,

同事又好,

會員又好,

都有好有壞.

 

壞到出面既,

避得就避啦.

最怕有d係表面幾好,

但實際可能好衰既,

你信錯左佢地既話都幾弊,

所以而家都唔係太敢好快就好主觀咁認定一個人,

了解番咁上下先好.

--
Jason Kwok (\/)@-@(\/)

又打完波...

都係無乜feel,

打完贏又好,

輸又好,

都係咁...

 

不過都有d野想去做下,

叫做set到少少目標俾自己.

 

兩個幾星期無打波,

今日都仲set到波都叫做幾好彩,

不過個人就幾亂,

成日都心大心細,

唔知set去邊好,

班隊友又打得唔好.

 

所以lunch之後就試番打大搥,

不過都唔係咁上手.

 

後尾last一場終於都ok,

仲俾我拎埋最尾果分,

拎番個季軍,

都叫做做到d野.

 

轉番打大搥,

一來因為班隊友發揮得差,

想幫手頂下,

二來想証明俾佢地睇,

打大搥就唔好對setter咁多要求,

set得差少少都話打唔到.

大搥就係要黎包底既,

咁易打駛鬼你打.

 

不過真係身子差左,

打完一場大搥都已經散晒.

--
Jason Kwok (\/)@-@(\/)

夏日, 暫別一會

SEE YOU SOON AGAIN IN THAILAND

又一個早起既星期日

唉~ 繼上星期日要早起做PROGRAM,

今個星期日又要晨早走入去青衣等打波.

 

係啦, 係等呀,

都唔知邊個諗出黎既,

晨早要人走晒入去抽籤,

好彩既就早D有得打,

唔好彩既要等成三個幾鐘先打到,

咪玩啦...

 

記得前年定上年都係呢個時候打葵青區,

果時凍到要帶暖蛋先打到波,

今年真係未凍過...

 

因為上堂,

無練兩個星期波,

希望星期日都仲打到啦...

--
Jason Kwok (\/)@-@(\/)

大細路

都廿六歲,

同身邊既朋友都好似大唔透咁,

成日都掛住玩.

 

不過可以KEEP住咁都唔錯,

無咁多煩惱.

只要係適當既時候做番大人咪得囉.

--
Jason Kwok (\/)@-@(\/)

學影相

最近第一次"正式"咁上堂學影相,

先發現原來自己係呢幾年上網睇書都學左幾多野,

雖然佢第一堂講既係好基本既野,

但係我諗好多同學仔都唔問佢講乜,

好在我識先明.

第二堂學構圖就真係學到野,

因為不嬲都好少留意構圖.

 

一張相靚唔靚,

講既係光色構圖,

光最麻煩,

自然光又係就時間就太陽,

用閃燈又要飛燈又要呢樣果樣.

色又要睇地方,

構圖又要睇心思,

所以影一張靚相都幾煩.

 

不過一直都認為影相係為左留住果一刻o者,

capture到個moment,

第日睇番都會覺得好開心.

 

丫... 如果咁諗...

又唔駛買貴機喎.....
--
Jason Kwok (\/)@-@(\/)

Dayoff

連續工作左差不多成10日,

終於都等到dayoff,

雖然都要返一返去做少少野,

不過總算可以休息一下.

Hea完之後下個星期又有排忙啦...

 

襯今晚可以夜d訓,

都打番好多篇野,

又執番少少屋,

都幾好.

 

繼續打多幾篇先..

--
Jason Kwok (\/)@-@(\/)

劇毒

呢排係咁睇數碼單反既價格,
一手緊係好d,
但係二手又平d,
不過就算價岩都好,
筆錢都係太多
雖然都叫做俾到,
但係都仲想儲番d錢,
唔好用得咁盡,
所以都唔係話買就買.

而且又唔想買果d入門單反,
玩果d,
我而家呢部都玩到,
所以係諗緊買部好d既,
雖然係舊model(最近都停產左lu).

同埋一買部單反,
就要用多筆錢去買鏡頭.
呢排都諗埋想買邊幾支,
所以其實要用幾多錢,
心裏有數.

不過黎緊又去旅行,
聖誕"豪華"旅,
"豪華"價錢,
唔"豪華"既住宿:p(不過有咁既機會係無價既),
所以都係唔好用咁多錢住,
遲下先,
而且就黎出新機,
想買果部應該都會再減多少少價,
等下無壞啦,
又唔係急住用.

p.s. 最近都用左少少錢又買多部相機... 想買好耐... 終於都等到有人賣...

HAHA, 計埋影相果部, 送左俾人一部, 同埋第一部壞左既, 夾夾埋埋有成25部 O_O''

--
Jason Kwok (\/)@-@(\/)

幻想

始終都係幻想好d,

自己想點都得,

太多真實既野都唔係咁想見到

--
Jason Kwok (\/)@-@(\/)

人

人生過左廿幾年,
遇過唔少人,
識過唔少人,
對人既記憶就開始越黎越混亂,
究竟呢個人係識唔識既呢?
呢個人只係見得多丫, 定係其實係識既呢?
見得多既, 係邊度見過呢?
識既話, 又係邊度識, 佢又係邊個呢?

New comment on youtube... "Complicated"

Comments & Responses

Post a video response Post a text comment

azerman (3 hours ago)

Asians trying to sing english songs....funny :)

--
Jason Kwok (\/)@-@(\/)

一週回顧

9.11.06 四

今日開左大半個team meeting之後，

就走左去西灣河文娛中心度開技術會議，

因為11月26號有會"男人"表演，

到時要幫下手。

 

因為其實好快就到26號，

所以黎左呢次會議聽多d果日既程序，

可以叫做放心d，

但係知多左既時候又唔係太放心...

 

夜晚去左HKU P2打波，

刷損左大脾一大撻，

唔算好痛，

但係止左血都仲留緊好多透明既液體...

 

返到屋企都無搵野包住個傷口，

希望佢會乾番，

最好結埋蕉。

 

 

10.11.06 五

訓左成晚(其實都唔係訓得太好），

個傷口都仲係濕濕地，

但係又要返工，

又要著長褲，

所以就用張紗布蓋住佢，

好在都唔係特別痛，

但係就都仲係濕既...

 

今日都特別多野做，

因為聽日就新中心開幕，

所以好多野要預備，

又要走黎走去，

又要搬搬抬抬，

好在個傷口都無乜事，

淨係需要去廁所度整整，

換一換張紗布。

 

 

11.11.06 六
詳情請見之前既post。

 

至於個傷口，

本來起身果時都乾左，

但係因為整番張紗布上暬既關係，

放工返到屋企個傷口又爛番...

 

12.11.09 日

今朝入左將軍澳打排球區賽，

如果贏左既，

就下晝繼續打；

輸左既，

就同班friend返大陸玩。

 

個傷口今日好番好多，

結左蕉，

而且郁動都無問題，

只係撞到話會痛。

 

結果無出到我，

有個隊友俾人撞到爆骨，

入左醫院，

但係贏左，

所以下晝繼續。

 

因為要等成3個鐘先打下一場，

所以上左個隊友屋企睇波，

佢住順天村，

環境好好呀，

舊，但係涼爽。

不過佢屋企就狗竇一樣，

同埋真係養左隻狗。

 

之後打波輸一場贏一場，

得第3，

我夾埋打左一場多dd，

無乜impact，

贏輸都無所謂啦。

 

 

12.11.06 一

無特別。

 

13.11.06　二

都無乜特別。

但係就又去左西灣河文娛中心又係開技術會議，

今次就係另一個表演，

日期係12月5號。

 

14.11.06 三

一連開左三個會，

無啦啦d咪又有d事，

無啦啦又煩一煩...

 

夜晚打波無乜人，

hea住咁打，

不過玩番大搥，

都仲打到。

另外開扣球式發球好勁，

都仲幾fit，

但係唔會轉番打大搥啦，

身子差左，

負荷唔到。

--
Jason Kwok (\/)@-@(\/)

發牢騷

又要發下牢騷,
今日做野真係做得好無引.
睇得呢個blog既同事都算係好朋友,
睇左就算,
無謂公開.

今日新中心開幕,
上頭話係中心一件大事件,
大家都要隆而重之,
但係feel到既大家,
只係自己部門既同事緊張,
其他...

或者可以話係分工分得唔平均,
所以有d同事好快手就做得晒自己果d野,
又或者之前一日無乜野要準備.
我果part都唔多,
主要係睇音響同整個board,
都算快手整好.

咁整好左見d同事未做完,
咁緊係好自然會幫手架啦,
執中心, 佈置中心,
掛banner, 執頭執尾,
都搞左成日.

成日見得最多既都係自己部門既同事,
咦? 又話係全中心既事黎既??

算... 見收工之後都有其他部門既同事留低幫手吹波...

到左今日,
有人同我講成朝水都未飲過,
我心諗,
我要搬要抬仲早過你返工都未出聲啦...

搵人幫手去中心拎少少野,
又話遠又話剩,
結果都係要搵"自己人"幫手...

或者你地好"專一"咁做好自己既工作,
我就好"多餘"咁八掛其他野,

或者出黎做野都係咁...

雖然中心成日講機構文化,
又話要團結,
成個中心係一家人,
邊個要幫果時實有人幫.

係就係有人幫,
不過係"自己人"...

琴日或者你地係舊中心唔知我地係新中心有幾多野做,
唔知要幫手.
但係今日好明顯完左個活動之後大把野要執,
但係都好盡責咁執好晒自己野就失左蹤...

估唔到著高跟鞋既司儀都要企高拆banner,
unit ic 都有幫手執椅啦,
你地去左邊呀??

好心淡...

--
Jason Kwok (\/)@-@(\/)

相機 vs 旅行

今次同中學同學去旅行,

計落算係第二次,

第一次係跟學校返大陸交流,

今次係畢業後既第一次,

所以好興奮,

好期待.

 

琴日搞左半日,

終於都落左訂,

而家等confirm有冇酒店,

希望去到啦.

 

聖誕先去,

但係雖然早成個幾月報名,

都有好多機位無晒,

酒店房都無乜.

 

個計劃都同初初諗果個有d唔同,

8個人變6個人,

布吉蘇梅巴提雅變到只係曼谷,

5日變4日,

但係開心指數都無減到.

 

而家淨係去曼谷,

希望有一兩日可以join到d local tour,

或者自己去到d海灘玩下啦,

過番個熱辣辣既聖誕節.

 

回應番個heading,

其實如果唔用呢次旅行既錢,

可能會俾多少少錢買部好想買既相機,

但係兩者擇其一,

都係揀旅行好,

一來無乜機會大家都放到假,

又咁好興緻一齊去玩,

二來相機都係成日轉,

遲d買可能仲抵玩.

--
Jason Kwok (\/)@-@(\/)

郁手整相機

頭先用一用部相機,
先發覺無啦啦個鏡頭蓋開唔到,
睇真d原來有d液體痴住左.

都唔知乜野黎既...
淨咁抹又抹唔到,
無辦法之唯有出手拆左佢...

初初諗住唔到個鏡頭蓋就算,
起碼都仲影到麻.
但係又好好彩咁拆得開,
又整得番,
而家無事lu,
真係好好彩.

show不滿

前晚練波終於都認唔住氣,
好勞氣咁發左少少脾氣.

話說果日隻手指公都仲痛緊(而家都仲係),
已經忍住繼續打波,
有一班人又係度好唔認真咁求其練,
到開game果時有條友仔,
又成日係度左comment一句,
右又comment一句,
我真係頂佢唔順,
叫佢收聲.

寬己嚴人,
真係頂唔順。

Youtube~~

加左Video link啦, 有時間睇下啦, 間唔中會update架
http://www.youtube.com/profile_videos?user=yskwok

夜晚唱K

photo of the night~

間房好藍呀，
影到個個人都好藍，
好襯halloween呀。


d人亦都玩到好鬼癲呀，
影左好多片，
睇番都真係好鬼好笑呀，
遲d upload埋先。

睇相先

Halloween 06

哈囉喂06

上年第一次去過哈囉喂，
今年Encore，
去既人有d唔同，
多左d少見既朋友仔。



呢晚去之前行左陣銅鑼灣，
乘機去左買冬甩。
試食左個之後買左一打halloween既冬甩，
自己食左三個，
分左幾個俾朋友食，
係就係甜d，
但係當甜品都幾好食。


由左上至右：原味，檸檬餡，果醬，蘋果餡，無餡，唔記得係乜

入場前等人齊果陣，
大家都開始化妝，
初初大家都無乜意慾，
但係畫畫下就愈過癮，
結果我就畫到成個小丑咁，
都幾得架，
嚇到下其他人 :P

因為上年既排隊經驗，
今年買左fastpast，
真係快好多，
唔駛排隊就玩晒6個鬼屋。

可能上年都玩過，
今年無上年咁驚，
但係都好好玩，
因為同入面d鬼有interaction，
成日都俾佢地問我塊面做乜，
哈哈。
係其中一間鬼屋入面，
我地仲捉住其中個friend，
「進貢」俾隻鬼添呀，
hehe。
又有個鬼屋既gimmick係戴3D眼鏡玩，
但係又無乜特別。

除左玩鬼屋之外，
都玩左個影院，
又睇左個band show。



另外亦有玩海盜船、跳樓機同越礦飛車，
拍左d video，
好正。




最後用左部新printer print左佢地個鬼樣出黎出俾佢地，
仲影左張齊齊show pass既合照 =)