又開花了
星期二, 5月 31, 2005
星期一, 5月 30, 2005
星期五, 5月 27, 2005
美食之日
其實也不算是甚麼大不了的美食，只是比平時花多些金錢在吃
下午因為要到總會開會，所以早些到了尖沙咀的新港中心看看有甚麼好吃。轉了幾個圈，選了元八拉麵（醬油湯底）。味道沒有特別，叉燒也是一般，可幸湯底不太濃，喝清了也不口渴，而且拉麵夠彈牙，夠咬口，也算不錯。
然後晚上經過中環，下車看看。經過泰昌，已經關鋪了，未試過它的蛋撻和沙翁，感到有些可惜。再行前些，發現原來蘭芳園在這?，於是走了進去試了著名的薑蔥雞扒撈丁和凍奶茶，又是有些失望，薑蔥撈丁是個新鮮的配搭，但不太喜歡有太多薑，而且份量很少；凍奶茶還不錯，很有茶味，其中特別的是其中兩粒冰是奶茶雪成的，但其他冰只是清水，所作用不大，只是噱頭。最後外賣了個著名的牛利包，這個真是要讚，包面焗過的，有些爽脆，夾著蕃茄和沙律醬，牛利有肉汁和嫩滑，一口咬下去，各個配料混在一起，十分滋味呢！
星期四, 5月 26, 2005
星期四, 5月 19, 2005
又大一歲
好多野想寫呀，但係一直都提唔起勁寫添，今次一定要寫好?
可能因為icq入個都無寫到幾時生日，所以應該都無乜人記得我生日。（well...就算有寫都無乜人會出聲:P）不過無所謂啦，生日前後果幾日都過得好開心。
14號打softball festival，四強雖然輸左，但係都叫做拎左個第三/四，算幾勁架啦。然後果晚同中學朋友仔篤波（←我好屎波）打邊爐。終於都試左有骨氣，因為個朋友有中銀咭，所以$88任食，的確係唔錯既，豬骨煲好食、水晶叉燒飽又好食、粉皮又好爽，不過雞子都唔好食既，以後都唔會試。然後去左世貿打機，都好多年無去過啦，屋企仲有廿零個coins，有排都唔會用，做硬歷史遺物。好可惜，呢晚就開始病啦...
玩完返到屋企都仲係咁流鼻水，好難得先訓得著，不過都訓得唔好，兩點幾訓，訓左3-4個鐘，6點零就醒左，頂唔順走左落街買藥食。平時我都係慣左"牛"好佢，不過今次真係頂唔順。之但係，呢兩日都full晒節目，九點鐘要入到沙田打排球區賽，所以都無再訓到，淨係係度包下雲吞咁，跟住就死左出街喇。
打波打左一局，係後備換出去既，換左個幾黑人憎既後二，成日持住自己高，好勁咁，就睇小其他人，果日佢狀態唔好，所以換走左佢。後尾佢仲死撐話唔應該換佢走，真係激死人。打完波，食埋野都仲早，約左班同事呢兩日去樹屋宿營，其中有一班就1點買野，不過都未夠鐘，所以就到左火車站之後走左入去M記睇免費雜誌。終於等齊人買齊野，率先第一隊到樹屋探險。
果晚營火會先知原來呢樹屋田莊係個同事以前開既，之前淨係知道佢係度做過，所以佢推介我地去，估唔到原來係佢同幾個朋友夾份開咁勁，間樹屋呀，個池塘呀都係佢地一手一腳整出黎。
因為掛住影相，所以一開始就走失左少少:P。擺低d野之後就去參觀第一個景點－樹屋。
一行三人"束"一聲就徒手爬左上去，個樹屋設計簡單得黎幾有味道。後尾其他人黎到，我地係上面望番落去幾得意，高高在上咁，都有兩三層樓咁高架。離開間樹屋唔駛爬番落去，而係可以好似消防員咁用條柱sir落去。
睇落去個感覺得都幾驚下，雖然有做安全措施，不過個個輪到佢果時都要擾攘一輪先肯落去，我都係:P。之後去左玩拉艇仔，
即係好似大澳果d拉條繩過河果隻，其實無乜特別，平衡到，控制到個重心就得，不過有幾個人係呢度濕左身。然後玩左陣攀石、打左陣排球、係幅田度割左棵生菜...果晚燒野食，
無乜胃口，應該係因為個鼻，已經流左成日鼻水啦，淨係食左dd野同兩塊好好食既蜜糖麵包。之後搞左個好小型既生日會，對象係三個5月生日既同事，包括我。其實之前都知會有野搞架啦，所以無乜驚喜咁啦，但係收到份禮物就好鍾意，
原來俾人地知道自己鍾意d乜野係幾好既。（有時我知道d朋友鍾意d乜野，行街果時都會留意下，有時都會買俾佢地添）以前營火會通常都好少可有火，最戇居係堆晒d光管電筒扮係火堆，今次唔同，真係有火，仲係燒木頭既大火，有feel到爆。
即場仲有d印地安人既服飾著上身，又有得畫臉，
跳下營火舞，又用個營火焗左個大麵包，
再有個小小既分享會（我好感觸咁講左幾句心聲，haha），咁就過左第一日。果晚個個都唔捨得訓，坐晒係間好細既屋仔度，傾下無聊野咁。
可能因為開左冷氣既關係，電壓唔夠，搞到好多地方都唔夠電著燈，有段時間成間屋都黑晒，好彩我份禮物識得發光，
都算係幫到下手咁。到左第二日，好"正常"咁九點度起左身，但係個人真係散晒，個鼻仲未好番，係屋外面行左個圈之後就返左去繼續訓。訓到咁上下有野食，食完又再訓過。結果訓到佢地走人先起身啦，所以無去到睇貓頭鷹呀，土著d草屋咁。Anyway，訓完都精神d，坐番車出火車站飲埋茶就散band，返到屋企就緊係再訓過啦。
就係咁，生日就咁訓過左喇。
星期日, 5月 15, 2005
四強止步
壘球聯賽入面，
每一季都會有一個體育節，
其實就好似一個盃賽咁，
每隊隊伍分組別打淘汰賽，
而B-blue同B-gold係同一組既，
即係我地(blue)要同勁d既人打。
雖然我地上年聯賽全勝，
但係o係之後既季後勝輸左，
所以先無升到B-gold，
理論上，
都夠實力同B-gold既隊打過。
今日打呢場係對一隊B-gold既隊，
其實上年係體育節都贏過佢地架啦，
不過今日發揮得麻麻地，
加上佢地有大吉星照住，
所以係我地領先既情況下俾人反超前，
結果輸左。
我本來有球係全壘打黎架啦，
不過因為Ground Rules既關係，
淨係可以上到二壘，
激死人呀。
後尾要偷返本壘果陣，
仲整損晒成隻前手臂，
好彩只係磨損少少，
唔係太痛，
但係都好大撻架。
星期六, 5月 14, 2005
KUTAR
簡簡單單的電腦小遊戲，
一直都深得無聊人的喜愛，
在空閒時(或逃避現實時)消磨時間。
Kutar是一個網上免費下載的小遊戲的主角-貓，
他的特徵是沒有表情，
傻傻的，
如果在遊戲中輸了，
他會嗶一聲然後變肥了，
很可愛。
在網上面可以免費下載一系列廿個小遊戲，
設計十分簡單，
只需使用滑鼠左click右click便可，
感覺就好像小時候玩的咭片遊戲機一樣，
很簡單，
但很有趣。
快去下載玩玩啦！
不過是日文的，
不懂安裝可以問我哦！
Kutar Official Homepage
星期五, 5月 13, 2005
你愛香港嗎？
一兩年前開始，國內自由行盛行，所以介紹香港的節目和雜誌陸續登場，甚麼香港涉谷，香港心齋橋，十分好笑。然而，這些節目亦介紹了不少不為香港人知道的地方，香港的好地方。
試想想，香港有幾多地方你未去過？就算經常去的地方，你有停下腳步，留意周圍的環境嗎？這兩天自由行中上環和赤柱，兩個地方你都去過吧，我也常去，不過這兩天停下來看，留心地歡察，亦發現了很多，雖然是"很熟悉"的地方，但仍覺很有新鮮感。縱使同事朋友都覺得放大假不出外，十分浪費，但其實香港亦有很多地方留待你去發掘，而且便宜，又不需太多的計劃，平靚正。可能現代人都習慣看得太遠了，時常忽略了身邊的事、物和人。那麼，是時候戴起眼鏡，珍惜身邊的事、物和人了。
星期三, 5月 11, 2005
放大假最充實的一天
呢一日朝早因為繼續落雨，所以唯有留係屋企，睇埋超人特工隊既特輯(早一晚先睇左套戲)，好好睇，最鍾意好classic卡通果part，d公仔係畫出黎，但係個口就key個演員既口上去，郁下郁下咁，好得意。
食完晏，見個天停左雨，所以決定起行，目的地係中上環，拎左把"姐"同袋就出街喇。
係屋企樓下坐720去到總站信德中心落車，行左陣信德中心，順便睇埋少少澳門船飛既資料。
之後行左去上環入面d街仔，好鍾意d建築物，好古舊，好有feel。轉左幾個圈，都唔知自已行到去邊，想行去摩籮街睇下野，但係又行錯路，好彩有d路牌指指下，咁先行到番去。以前行過見到d毛uncle既錶仔都想買架啦，又唔係好貴咁，今次行左幾轉，終於忍唔到手買左個紅色鐘仔。好舊架啦，有少少生鏽咁，有日子顯示添架，不過我揀果個就係壞左既。點解壞左都買，因為秒針係架飛機仔黎架，好cute。其實有d都好新，不過無feel，所以唔買。
行下行下都行左兩個鐘咁制，之後決定行去金鐘食漢堡包，途中見到三聯，所以走左入去睇書。心目中都有d書想買既，不過搵唔到。但係就有意外收獲，買左一本叫做"日本OL的餐蛋麵"。本書係一個成日黎香港旅行既日本人寫既，佢好鍾意香港，仲學埋廣東話，用白話文寫左呢本書。本書入面講左好香港人無留意既好野，所以我睇完之後，都覺得香港可愛左好多^^。佢仲有另一本書架，有機會要買埋先得。
跟住行到去金鐘食Triple'O，之前睇d食評，都好想去試架啦，終於都的起心肝去左食。叫左個Original Combo($49)，入面有一個Original Burger，一包Fries，另外加$20轉左杯汽水做士多啤梨奶昔，total用左$69食個漢堡包餐，好貴，但好食。個麵包係佢地每日焗既，好鬆軟；塊漢堡好多肉汁，又唔會好似M記果d咁實淨，好好咬；包入面d醬汁都好好食，好似係沙律醬加茄汁，但係好好味；d薯條係粗身果隻，好有咬口，有d痴住薯皮既最好食；d薯條有得點醋或者茄汁，試過醋，麻麻地，都係茄汁好食d；個奶昔係純用雪糕同奶打成，好濃呀，用飲筒吸得好辛苦，最好係開左個蓋佢大大淡咁飲，好味。睇食評話份野好大，都唔係太，有少少失望，但係食完都頂住晒個胃，好飽，好滿足。
食完野都仲早左少少，本來諗住返一返屋企沖個涼先繼續下場，不過收到電話，個朋友都早到左，所以就直接去左。跟住既目的地係Physical，無錯，係做Gym，大學果時都玩過下，不過好辛苦，所以玩左陣就放棄左。見班舊同學玩得咁開心咁，又有興趣玩下，一來可以fit d，打波都勁d(主要都係練爆炸力o者，唔係為左練到好大隻咁)，二來多d機會同佢地聚下都幾開心架。上到去勁多人，見試左部用黎拉筋既機，又幾好用喎，最正係唔駛用力都拉到麻。然後跟佢地做左幾部機，有d位真係發唔到力，有d位又郁唔到，個較位有d野，最後仲唔知點解咁發現隻左手爭又傷左喎，真係奇怪。7點幾開始做，做完都成10點幾，不過都唔係太累，可能就住做啦，不過會繼續做。
最後一站竟然係食火窩，因為佢地個個都住柴灣，所以入左柴灣食。咁夜入柴灣都無乜所謂，一來放緊大假，二來柴灣對我黎講都算近啦，平時返工都係咁，以前去玩又係咁，相比起練親波都要去到葵芳，真係好近，其實香港咁細，入到天水圍都唔算好遠o者... 而家諗番起果間晚有食呢個豬頸肉，點解咁好似以前都無人提起過既呢？係以前無豬頸肉？d豬無頸既？？定係d豬肉佬留起晒？？？奇怪奇怪！！！
星期二, 5月 10, 2005
星期四, 5月 05, 2005
星期三, 5月 04, 2005
get ready?
原來聽日就開始放我既大假啦，
但係心情都好似未準備好咁，
個假好似黎得太快啦。
放假呢十幾日，
中心入面要交代俾同事跟進既事唔多，
所以又好似未準備好放假咁。
今日突然間又好多野做咁，
做埋佢先
訂閱：
留言 (Atom)
